З 19 па 23 лютага ў Мінскай вобласці прайшла серыя мерапрыемстваў, прымеркаваных да Міжнароднага дня роднай мовы. Арганізатарамі выступілі прадстаўнікі БелТІЗ пры падтрымцы спецыялізаваных бібліятэк і валанцёраў.

19 лютага ў Мінскай абласной арганізацыі БелТІЗ адбылося літаратурнае мерапрыемства «Вытокі роднай мовы». У праграму ўвайшлі аўтарскія чытанні твораў на беларускай мове з удзелам пісьменніц Іны Фролавай і Ірыны Тулупавай. Таксама супрацоўнікам спецыяльнай бібліятэкі для сляпых была праведзена тэматычная віктарына.

23 лютага святкаванне працягнулася ў Гарадской спецыялізаванай бібліятэцы Маладзечна, дзе прайшла пазнавальна-гульнявая праграма «Сіла роднага слова». У інтэлектуальным спаборніцтве, якое складалася з пяці тураў на веданне беларускай культуры і мовы, прынялі ўдзел каманды ўнітарнага прадпрыемства «ЭНВА» і прадстаўнікі БелТІЗ з Валожына і Маладзечна.

Мерапрыемства было арганізавана ўпаўнаважаным прадстаўніком БелТІЗ Мікалаем Саўчанка і бібліятэкарам Наталляй Божка. Падтрымку аказалі валанцёры парафіяльнай арганізацыі «Карытас» касцёла св. Піо. Праграма завяршылася выступленнем Барыса Доніна і ўручэннем удзельнікам памятных сувеніраў з нацыянальнай сімволікай.